Paningkamotan sa gobyerno sa Pilipinas nga mapakunhod ang 12.5 porsiyentong taripa nga gipahamtang sa mga produktong Pilipino nga mosulod sa merkado sa Estados Unidos atol sa gikatakdang state visit ni US President Donald Trump sa nasod.
Gipadayag ni Department of Trade and Industry (DTI) Secretary Ma. Cristina Roque nga usa sa mga tumong sa Pilipinas mao ang pagpakunhod sa maong taripa pinaagi sa negosasyon tali sa duha ka nasod.
Matud ni Roque, gusto niyang mapagamay pa ang taripa aron mas mapalambo ang pagbaligya sa mga produktong Pilipino ngadto sa Estados Unidos.
Gipahayag kini sa kalihim atol sa press conference human sa pagtapos sa ika-28 nga Association of Southeast Asian Nations (ASEAN) Economic Community Council sa Pasay City niadtong Lunes.
Gitubag ni Roque ang pangutana kon hisgotan ba sa Pilipinas ang pagpaubos sa 12.5 porsiyentong taripa atol sa pagbisita ni Trump.
Gilauman nga mahimong bahin sa mga hisgotanan sa duha ka gobyerno ang mga palisiya sa pamatigayon ug ang pagpalig-on sa relasyon sa ekonomiya tali sa Pilipinas ug Estados Unidos.
Photo courtesy: Reddit










