Nakumpiska sa National Meat Inspection Service o NMIS-Caraga ang mga nadaot nang produktong karne gikan sa pipila ka meat shop sa dakbayan sa Butuan atol sa gipahigayong monitoring. Mikabat sa 14 kilos nga pork ribs ang nakumpiska sa enforcement team human makit-an nga dili na kini angay ibaligya ug konsumohon sa publiko.
Gipang-condemn ug gilubong dayon sa NMIS-Caraga ang maong mga karne aron malikayan nga makaabot pa kini sa mga konsumidor ug posibleng makadaot sa ilang panglawas. Namatikdan usab sa inspection team ang dili hygienic nga pagdumala ug pagtipig sa karne, ilabina ang mga frozen products nga direktang nakontak sa salog.
Tungod niini, hugot nga gipahinumdoman sa NMIS-Caraga ang tanang negosyante nga sundon ang saktong proseso sa pag-andam, pagtipig ug pagbaligya sa karne aron masiguro ang kaluwasan sa publiko. Gipasiugda usab nga ang pagpanalipod sa konsumidor magsugod sa limpyo ug luwas nga pagkaon nga ginabaligya sa merkado.
Photo courtesy: Nmis Caraga










