Nagmarka sang isa ka makasaysayan nga kadalag-an ang Probinsya sang Sultan Kudarat matapos opisyal nga naaprobahan ang ₱99.8 milyones nga Integrated Coffee Enterprise Subproject sa idalom sang DA-PRDP Scale-Up. Ini ang nangin pinakamadaku nga I-REAP subproject nga naaprobahan sa Rehiyon Dose.
Suno kay Erick Cajandig, PRDP/Project Consultant, makabenepisyo sa sini nga proyekto ang 998 ka mangunguma sang kape nga sakop sang apat ka cluster cooperatives sa mga banwa sang Senator Ninoy Aquino, Lebak, Kalamansig, kag Esperanza.
Tukuron pinaagi sa sini nga proyekto ang moderno nga pasilidad para sa pagproseso sang kape kag ang Sultan Kudarat Coffee Hub agud mapauswag ang kalidad sang kape, mapabakod ang mga kooperatiba, mapalapad ang merkado, kag madugangan ang kita sang mga mangunguma.
Daku man ang pagpasalamat kay Governor Datu Pax Ali S. Mangudadatu sa iya padayon nga suporta, pagsalig, kag dedikasyon sa pagpauswag sang industriya sang kape kag paghatag sang mas madamo nga oportunidad para sa mga mangunguma.
Photo courtesy:Sultan Kudarat OPAG










