Gideklarar sa gobyerno sa Fiji ang national state of disaster human miresulta sa grabeng hulaw ang El Niño, nga maoy hinungdan sa kakulang sa suplay sa tubig sa nagkalain-laing komunidad sa maong nasud.
Gipahibalo ni Prime Minister Sitiveni Rabuka nga pinaagi sa deklarasyon, mapalapdan sa gobyerno ang mga lakang sa pagtubag sa krisis, lakip ang pagpalihok sa mga kahinguhaan ug pagkoordinar sa paghatod sa hinabang ngadto sa mga apektadong lugar.
Gibutyag usab ni Rabuka nga naggahin ang gobyerno og 20 milyong Fiji dollars o katumbas sa 8.5 milyong US dollars alang sa pagtubag sa krisis, ilabi na sa paghatag og suplay sa tubig alang sa mga pamilya ug mag-uuma.
Samtang, sumala sa Fiji Meteorological Service, gilauman nga magpadayon ang ubos-sa-normal nga pag-ulan sa nasud hangtod sa Abril sa sunod tuig, samtang mas init usab kaysa naandan ang temperatura sa adlaw sa kadaghanan sa mga lugar hangtod sa bulan sa Enero.
Dugang pa, nagpasidaan ang mga eksperto nga nagkakusog ang El Niño sa rehiyon sa Pacific, nga mahimong magresulta sa dugay nga hulaw, kakulang sa tubig ug kadaot sa mga pananom ug kahayupan.
Photo courtesy: the-independent










