Giawhag sa International Monetary Fund o IMF ang mga nasud nga sakop sa Association of Southeast Asian Nations o ASEAN nga palig-onon ang pagnegosyo tali sa usag usa aron mapalambo ang ekonomiya ug makamugna og minilyong trabaho. Sumala ni IMF Managing Director Kristalina Georgieva dako pa ang potensyal sa mga nasud sa ASEAN nga mapalapad ang ilang komersiyo ilabina sa sektor sa serbisyo ug digital economy.
Gipasiugda usab niya ang Digital Economy Framework Agreement o DEFA nga gipirmahan sa Manila niadtong Nobyembre 14 aron mapadali ang mga transaksiyon ug mapakunhod ang gasto sa pagnegosyo tali sa mga nasud.
Base sa pagtuon sa IMF posibleng modugang og 4.3 porsyento sa Gross Domestic Product o GDP sa ASEAN ang pagtangtang sa mga babag sa pagnegosyo ug makamugna og dugang upat ka milyon ka trabaho sa rehiyon. Alang sa Pilipinas gilauman nga maghatag kini og dugang oportunidad sa pamuhunan, negosyo ug panginabuhian.
Photo courtesy: Atlantic Council










