Patay ang duha ka wala pa mailhing babaye—ang drayber ug ang iyang angkas—sa usa ka vehicular accident alas 4:30 sa kaadlawon niadtong Huwebes, Nobyembre 19, 2026, sa Provincial Road, Zone 1, Barangay Sankanan, Manolo Fortich, Bukidnon.
Base sa imbestigasyon, naka-park sa tuo nga bahin sa dalan paingon sa Manolo Fortich Proper ang usa ka Isuzu cargo dropside truck nga may plakang MBA8811 ug gimaneho sa usa ka 48-anyos nga lalaking may professional driver’s license, samtang kargado kini og mga preskong pinya ug naghulat sa transport vehicle padulong sa Del Monte sa Bugo, Cagayan de Oro City, apan kalit nga gibanggaan sa likod sa may tuong bahin sa usa ka yellow Suzuki motorcycle nga may plakang 784KVN ug walay OR/CR.
Tungod sa kusog nga pagkabangga, nakaangkon og fatal nga mga samad ang duha ka biktima ug gideklarar nga dead on the spot sa mirespondeng Barangay Health Worker sa Barangay Sankanan, uban sa Attending Physician ug Rural Health Officer
Kasamtangang anaa na sa kustodiya sa Manolo Fortich Municipal Police Station ang drayber sa truck ug ang duha ka sakyanan alang sa hustong disposisyon.
Photo courtesy: Manolo Fortich Municipal Police Station










