Giklaro sa Police Regional Office 9 (PRO-9) nga dili angay hukman sa publiko ang tibuok han-ay sa kapulisan tungod lamang sa mga pulis nga nalambigit sa ilegal nga mga kalihokan sa rehiyon.
Sa pakighinabi sa Juander Radyo News Team, gipahayag ni Police Major Shellamie Chang, Ang Regional Public Information Officer sa PRO-9, nga daghan gihapon ang mga kapulisan nga matinud-anon ug komitado sa ilang katungdanan sa pagpanalipod sa katawhan ug pagpatuman sa balaod.
Ang pahayag sa PRO-9 migula human sa sunod-sunod nga mga insidente nga nalambigit ang pipila ka mga pulis, lakip na ang pagpanion og pusil sa usa ka pulis ngadto sa usa ka sibilyan didto sa Dapitan City, pagkalambigit sa duha ka pulis sa smuggled cigarettes operation sa Pitogo, Zamboanga del Sur, ug ang bag-ohay nga insidente sa Barangay Tickwas, Dumalinao, Zamboanga del Sur, diin usa ka pulis ang giakusahan sa pagpanulis ug pagpatay sa iyang kaubang pulis.
Matud ni Chang, ubos karon sa pagpangulo ni Acting Regional Director Police Brigadier General Dennis A. Esguerra, Zero Tolerance og dili panalipdan sa PRO-9 ang bisan kinsang pulis nga mapamatud-ang nakabuhat og ilegal nga binuhatan.
Gidasig usab sa opisyal sa PRO-9 ang publiko nga magpadayon sa pakigtambayayong og mosalig sa kapulisan pinaagi sa pag-report sa mga kaso sa pang-abuso ug uban pang ilegal nga kalihokan og gipasalig nga hatagan sa tukmang aksyon subay sa balaod.
