Patay ang usa ka 44 anyos nga miyembro sa Civilian Volunteer Organization (CVO), samtang naangol ang usa ka 16 anyos nga menor de edad human nagbangga ang ilang gisakyan nga mga motorsiklo sa Purok 2, Barangay Bambung Daku, Ramon Magsaysay, Zamboanga del Sur, mga alas-7:35 sa gabii, Hulyo 5.
Sa inisyal nga imbestigasyon sa kapulisan, pauli na ang CVO member gikan sa usa ka family gathering sakay sa iyang Honda XRM, dihang nabanggaan kini sa motorsiklo nga gimaneho sa menor de edad nga gikan sa pikas nga direksyon.
Tungod sa kakusog sa impact, nakaangkon ang CVO ug grabeng samad sa ulo ug dali nga gidala sa Blancia Hospital sa Molave apan siya gideklarang dead on arrival sa miatiman nga doktor, samtang ang menor de edad nakabaton lamang og gagmayng bun-og.
Nasayran usab, igo lang unt mopalit ang menor de edad og dugang nga ilimnong makahubog ug gituohang susama nga lango sa ilimnong makahubog nga ilimnon ang duha ka mga nanagmaneho hinungdan sa ilang panagbangga.
Sa karon, gidala na sa Ramon Magsaysay Municipal Police Station ang duha ka motorsiklo alang sa hustong disposisyon ug dayon gitugyan na usab sa Municipal Social Welfare and Development Office ang nagmanehong menor de edad human makustodiya sa kapulisan.
Photo Courtesy: ZSPPO
