Walo ka Buddhist monks ang patay samtang kapin sa 20 ka laing mga indibidwal ang nangaangol human sila mabanggaan sa usa ka pickup truck nga gimaneho sa ka 11-anyos nga batang lalaki. Nahitabo ang trahedya samtang nagpahigayon og pilgrimage o balaang paglakbay ang mga biktima sa amihanang-silangang bahin sa Thailand. Sumala ni Mukdahan Governor Vorayan Bunarat, ang mga biktima lakip sa grupo sa 34 ka monghe ug lima ka lay followers nga nagbaktas gikan sa usa ka templo sa Mukdahan padulong sa kasilinganang probinsya sa Ubon Ratchathani.
Lima sa mga monghe ang dead on the spot, samtang ang laing tulo namatay na sulod sa ospital. Samtang, anaa sa 22 ka monghe ug usa ka layperson ang nangaangol, diin upat kanila ang kasamtangang anaa sa kritikal nga kahimtang. Sumala ni Major General Pairoj Thaiphutra, ang hepe sa kapulisan sa Mukdahan, ang bata nga drayber adunay special needs ug iyang gikuha ang pickup truck gikan sa ilang balay ug nakamaneho og mga 10 ka kilometro una pa man niini nabanggaan ang grupo sa mga monghe.
Sa pagkakaron, wala pa’y pormal nga kaso nga gipasaka ang kapulisan batok sa bisan kinsa samtang nagpadayon pa ang lawom nga imbestigasyon sa mga otoridad sa likod sa aksidente. Wala pa usab masukit-sukit sa mga imbestigador ang bata tungod kay anaa pa kini sa grabeng kahadlok ug shock, ug dili pa makahatag og opisyal nga pamahayag sa nahitabo.
Photo courtesy: Udonthani Update/ CNA
