Gipangulohan ni Cebu Gov. Pamela Baricuatro ang ceremonial groundbreaking alang sa pagtukod sa Temporary Learning Shelters (TLS) sa upat ka lungsod sa habagatang Sugbo.
Makabenipisyo ang maong proyekto sa mga tunghaan sa mga lungsod sa Boljoon, Alcoy, Dalaguete, ug Argao isip kabahin sa paningkamot sa kagamhanan sa Probinsiya sa Sugbo sa pagsulbad sa kakulang sa mga rooms samtang padayon nga gipauswag ang mga pasilidad sa edukasyon sa tibuok probinsiya.
Ubos sa maong programa, tulo ka TLS units ang tukoron alang sa El Pardo Elementary School sa Boljoon. Usa usab ka unit sa Bala-as Elementary School ug Langtad Elementary School sa Argao, Mantalongon Elementary School ug Obong Elementary School sa Dalaguete, ug Pasol-Pugalo Integrated School sa Alcoy.
Nigahin ang kagamhanan og kinatibuk-ang P9,120,882.96 alang sa maong proyekto. Sa mensahe sa gobernador, padayon nga pasalig sa kagamhanan sa pag-atubang sa mga hagit nga giatubang sa nagkalain-laing sektor, ilabina sa edukasyon.
Anaa usab sa groundbreaking ceremony sila Dalaguete Mayor Nelin “Bembie” Tambis; Argao Mayor Allan Sesaldo ug Vice Mayor Atty. Orvi Ortega; Second District Provincial Board Member Raymond Calderon; mga konsehal sa Boljoon, Argao Councilor Jag Lucero; Liga ng mga Barangay President Rainier Rumaguera; ug DepEd Cebu Provincial Schools Division Superintendent Willy Adonay.
Gipasalig usab sa gobernadora nga magdugang pa og pondo ang kagamhanan alang sa napili nga mga eskwelahan nga tukoran og duha ka andana nga classroom buildings aron mas matubag pa ang kakuwangon niini.
Atol sa maong kalihokan, gitunol usab ang 20 ka industrial fans ngadto sa nagkalain-laing barangay sa Argao pinaagi sa Local Assistance Fund (LAF) ni Provincial Board Member Raymond Calderon, uban sa suporta ug pag-aprubar.
Photo courtesy: Cebu Province
