Nanawagan si Department of the Interior and Local Government (DILG) Secretary Jonvic Remulla sa publiko nga motabang sa gobyerno sa pag-ila ug pagreport sa mga posibleng hulga nga mahimong makahatag og kagubot, ilabina sa mga eskwelahan. Kini ang gibutyag ni Remulla panahon sa press briefing niadtong Hunyo 24 niining tuiga.
Matod pa ni Remulla, mahimong motawag ang publiko sa 911 aron mapahibalo dayon sa mga otoridad ang bisan unsang kahimtang nga posibleng makahatag peligro sa kaluwasan sa komunidad. Gibutyag usab niya nga ang paspas nga pagreport, makatabang sa paglikay sa posibleng trahedya.
Gibatbat usab sa DILG secretary, ang kamahinungdanon sa kooperasyon sa publiko pinaagi sa paghatag og impormasyon sa mga otoridad, sama sa gihimong pagreport ni Senador Bam Aquino sa giingong plano sa usa ka menor de edad nga sundon ang nahitabong trahedya sa Tacloban. Matod ni Remulla, ang maayong koordinasyon tali sa katawhan ug gobyerno, maoy yabi, aron mapadayon ang kahusay ug kalinaw sa mga komunidad.
Photo Courtesy: Philippine News Agency
