Gipahimangnoan ang mga ginikanan sa pagmonitor sa online activities sa ilang mga anak aron malikayan ang posibleng negatibong epekto niini sa ilang pangisip ug panggawi.
Gikabutyag pa ni PLtCol Jumark Caña sa RACU10 nga kung dili mabantayan ang paggamit sa internet ug social media sa mga kabataan, dako ang posibilidad nga maimpluwensyahan sila sa dili maayong content nga mahimong makaapekto sa ilang mental health ug emosyonal nga kahimtang.
Gipasabot usab nga anaa pa sa yugto sa pagtubo ug paghulma sa ilang kinaiya ang mga batan-on, busa importante ang giya ug suporta sa mga ginikanan aron malikayan ang mga sitwasyon nga mahimong mosangpot sa dili maayong desisyon o pamatasan.
Busa, giawhag ang mga ginikanan nga mahimong aktibo sa pagdumala ug pagmonitor sa digital activities sa ilang mga anak alang sa ilang kaluwasan ug maayong kaugmaon.
Sa pikas bahin, dili total ban sa social media ang solusyon aron makunhuran ang risgo sa pagkaadik sa mga kabataan niini, ilabina karong modernong panahon.
Kini ang gibutyag ni Macabalan National High School Principal Manuel Lincaro Jr. nga nag-ingon nga mas angay ipatuman ang hugot nga regulasyon sa paggamit ug pag-access sa mga bata sa nagkalain-laing social media platforms.
Matud niya, kinahanglan adunay giya ug pagbantay gikan sa ginikanan ug eskwelahan aron masiguro nga husto ug responsable ang paggamit sa teknolohiya.
Dugang pa ni Lincaro, importante usab nga aduna gihapon access ang mga kabataan sa gadgets tungod kay dako kini’g tabang sa research ug pagkat-on.
Gidasig usab niya ang pag-expose sa mga estudyante sa paggamit sa artificial intelligence o AI aron madugangan ang ilang kahibalo ug mapalambo ang ilang kahanas, basta adunay hustong giya gikan sa mga ginikanan ug magtutudlo.
Photo Courtesy: Pinterest
