Gikompirmar ni House Prosecutor ug Manila Representative Joel Chua nga nalakip ang usa ka Mary Grace Piattos sa listahan sa mga testigo sa impeachment trial ni Bise Presidente Sara Duterte, apan wala pa sila makigsulti kaniya.
Gitataw ni Chua nga importanteng saksi si Mary Grace Piattos sa kaso tungod sa matod pa kalabotan sa giingong sayop nga paggamit sa confidential funds.
Ang ngalang Mary Grace Piattos nabutang sa acknowledgement receipt nga gisumite sa kampo ni Duterte ngadto sa Commission on Audit (COA) kalabot sa paggamit sa confidential funds.
Matod ni Chua, ilang tan-awon kun duna bay nagpaila nga sila si Mary Grace Piattos aron kini ipaubos sa cross-examination.
Dugang niini nga kung walay mopatim-aw nga tawo, ang nasangpit nga pagkatawo mahimong mogawas nga bogus o dili tinuod nga tawo.
Gitataw usab ni Chua nga kun codename lang ang “Mary Grace Piattos”, kinahanglang ibutyag sa defense team ni Bise Presidente Sara Duterte kun kinsa gyud ang gitumong sa maong tawo.
Photo courtesy: istock
