Nakaangkon og ayuda nga bugas ang liboan ka mga residente sa lungsod sa San Miguel, Surigao del Sur pinaagi sa “Municipality of San Miguel Rice Distribution Assistance” ubos sa Programang Sagip Saka sa Probinsyal nga Gobyerno sa Surigao del Sur.
Gihimo ang pag-apod-apod sa bugas pinaagi sa mga cluster distribution centers aron mas dali ug organisado ang paghatag sa ayuda. Lakip sa mga lugar nga gigamit mao ang Tina Covered Court para sa mga barangay Tina, Magroyong, Libas Gua ug Siagao; Poblacion Covered Court alang sa Poblacion, Libas Sud, Baras ug Patong; Bolhoon Covered Court para sa Bolhoon, San Roque ug Castillo; Carromata Covered Court alang sa Carromata, Sagbayan, Umalag ug Mahayag; ug sa Barangay Hall sa Lower Bagyang para sa Bagyang, Bitaugan ug Calatngan.
Matud pa sa lokal nga panggamhanan, matag panimalay nakadawat og 10 ka kilo nga bugas. Gipasabot usab nga walay gipili sa mga benepisyaryo tungod kay ang mga lista sa nakadawat gikan sa tagsa-tagsa ka purok ug barangay.
Sa kinatibuk-an, 12,736 ka benepisyaryo ang nakadawat sa maong programa. Niini, 9,800 ka benepisyaryo ang natabangan pinaagi sa Probinsyal nga Gobyerno sa Surigao del Sur samtang 2,986 ka benepisyaryo ang gikan sa Local Government Unit (LGU) sa San Miguel.
Gipasalamatan sa lokal nga panggamhanan ang suporta sa probinsya sa pagpatuman sa programa nga nagtumong sa pagtabang sa mga pamilya ug pagpalig-on sa sektor sa agrikultura sa lungsod.
Photo courtesy: Mayor Michael T. Corilla
