Nagpasalig ang Department of Education (DepEd) Caraga sa mga ginikanan nga padayon nga gipahugtan sa mga eskwelahan sa rehiyon ang mga lakang aron masiguro ang kaluwasan ug seguridad sa mga estudyante.
Kini human gibutyag ni Pedro Tecson, Information Officer sa DepEd Caraga, nga aktibo karon ang ilang opisina sa pagmonitor ug pagpalig-on sa mga school security measures aron malikayan ang posibleng mga hulga nga mahimong makaapekto sa kaluwasan sa mga kabataan sulod sa mga campus.
Matod ni Tecson, wala’y angay kabalak-an ang mga ginikanan tungod kay adunay mga protocol ug koordinasyon nga ginapatuman sa mga eskwelahan aron mapanalipdan ang mga estudyante.
Gipatin-aw usab niya nga padayon nga ginatan-aw sa DepEd Caraga ang kahimtang sa seguridad sulod ug gawas sa mga tulunghaan. Lakip niini ang hugot nga pagmonitor sa mga bisita, pakigkoordinar sa mga lokal nga awtoridad, ug estriktong pagpatuman sa mga school safety protocols.
Samtang, gipasiugda sa DepEd Caraga nga magpadayon ang ilang pakigtambayayong sa mga school heads, local government units (LGUs), ug kapulisan aron mapadayon ang malinawon, organisado, ug luwas nga palibot sa tanang pampubliko ug pribadong eskwelahan sa rehiyon.
Nag-awhag usab ang ahensya sa mga ginikanan ug komunidad nga magtinabangay sa pagpalig-on sa seguridad sa mga kabataan pinaagi sa pagreport sa mga kahimtang nga mahimong makahatag og hulga sa mga estudyante ug kawani sa eskwelahan.
