Wala sa plano ang moretiro sa pagkanta ang veteranong singer ug composer nga si Jose Mari Chan bisan pa sa iyang edad nga 81-anyos.
Matud sa music icon nga magpadayon siya sa pag-awit basta adunay mga tawo nga mag-pabiling maminaw sa iyang musika. Giingon usab niya nga ang musika usa ka gasa gikan sa Diyos ug ang paghatag og kalipay pinaagi sa iyang mga kanta mao ang iyang paagi sa pag-pasalamat.
Kapin unom ka dekada na si Chan sa industriya sa musika sukad nagsugod siya niadtong 1966. Lakip sa iyang labing nailhang mga kanta ang Afterglow, Deep in My Heart, Can We Just Stop and Talk Awhile, Refrain, Constant Change ug Please Be Careful with My Heart.
Gipadayag usab niya ang iyang kabalaka alang sa mga batan-ong singer-songwriters tungod sa pagkunhod sa kita gikan sa royalties. Matud pa niya, halos wala nay halin sa mga plaka ug CD karon tungod sa digital downloads ug streaming, hinungdan nga wala na siya makadawat og regular nga royalty checks gikan sa mga recording companies.
Bisan paman, naglaom gihapon si Chan nga magpadayon ang suporta sa lokal nga musika ug sa mga bag-ong manunulat og kanta nga nanginabuhi pinaagi sa ilang talento.
Photo Courtesy: Pinterest
