Nagkabangga ang duha ka de-pasaherong tren nga nagdala sa gibana-banang 200 ka pasahero didto sa Bialosliwie sa kasadpang bahin sa Poland, alas-6:04 gabii Hunyo 26, 2026 (oras sa Poland).
Sumala ni Fire Brigade Spokesperson Pawel Rykowski, gikumpirma sa mga awtoridad nga duha ka tawo ang nangaangol sa maong aksidente, diin ang usa ka tren nagbiyahe gikan sa Kolobrzeg paingon sa Warsaw East Station samtang ang ikaduha gikan sa Pila paingon sa Bydgoszcz.
Tungod sa kusog nga impact, pipila ka bagon sa tren ang nangadiskaril o nangagawas sa riles. Tungod niini, daling nanganaug ug nagpundok sa daplin sa riles ang mga drayber ug mga pasahero aron masiguro ang ilang kaluwasan, base na usab sa mga video nga paspas nga nikatap sa social media.
Sa kasamtangan, luwas na ang kadaghanan sa mga pasahero ug nagpadayon pa ang gihimong lawom nga imbestigasyon sa mga lokal nga awtoridad. Kini gihimo aron masuta ang tinuod nga hinungdan sa maong seryosong panagbangga sa mga tren.
Photo Courtesy:Travel and Tour World
