Walay kabutangan sa kalipay ang 61-anyos nga ulitawo nga si Ernesto Ancajas human malakip sa mga mipaso sa graduation rites sa Alternative Learning System (ALS) niadtong Hunyo 25, 2026.
Ang maong seremonya gipahigayon sa Bukidnon National High School Gymnasium, diin si Ancajas, nga lumad nga taga Can-ayan, Malaybalay City, Bukidnon, usa sa mga garbong migradwar uban sa 79 ka elementary completers ug 425 ka Junior High School completers.
Sa esklusibong pakighinabi sa Juander Radyo Malaybalay, gibutyag ni Ancajas nga dili sayon ang iyang kaagi sa wala pa niya makab-ot ang maong kalampusan tungod sa kalisod sa panginabuhi, ilabina nga nagsalig lamang siya sa pag-backyard gardening. Nalangan usab ang iyang pagpadayon sa pag-eskwela kaniadto tungod sa kakulang sa pinansyal nga kahimtang sa iyang pamilya, ug nakasinati pa gyod siya og mga pagbiay-biay gikan sa pipila niya ka mga kaeskwela.
Apan bisan pa man sa mga hagit ug pagtamay, gipili ni Ancajas ang pagkamainantuson aron matuman ang iyang dugay nang pangandoy. Human sa iyang pagpaso, malaumon ug determinado karon ang 61-anyos nga ipadayon pa ang iyang pag-eskwela aron kab-oton ang iyang mas dako nga damgo—ang mahimong usa ka pari ug makaserbisyo sa Ginoo ug sa katawhan.
Photo Courtesy:BNHS
