Giluwas sa kapulisan sa Uttar Pradesh, India ang 12 ka lalaki nga giingong gihimong bonded laborers ug gipugos pagtrabaho sa usa ka gamayng pabrika sa Muzaffarnagar. Matod sa pulisya, gilimbongan sila pinaagi sa saad nga trabaho apan gipugos diay pagtrabaho sulod sa pipila ka bulan hangtod 18 ka bulan.
Matod pa gikumpiska ang ilang mga cellphone, gikandaduhan sulod sa pabrika, ug gipatrabaho adlaw ug gabii. Kung mangayo sila og sweldo o mosulay pagbiya, kulatahon kini. Usa ka uga nga roti (tinapay) lamang matag adlaw ang ilang pagkaon ug gibantayan pa sa mga pit bull dogs.
Duha ka suspek naaresto na samtang gipangita pa ang tag-iya sa pabrika. Ang mga biktima gikan sa Uttar Pradesh, Haryana, Bihar, Uttarakhand ug Nepal.
Ang insidente nakapukaw pag-usab sa kabalaka bahin sa bonded labor sa India, bisan pa man nga ilegal na kini sulod sa kapin 50 ka tuig.
Photo Courtesy: Indian Express
