Nag-viral karon sa social media ang American rapper nga si Zeddy Will human niya gipamatud-an nga wala gyud siya kaila sa pulong nga “social distancing” sa dihang gi-usa ra niya og pa-baby shower ang lima ka babaye nga iyang gipamabdosan.
Nagsugod ang maong teleserye sa tinuod nga kinabuhi sa TikTok sa dihang nag-post og imbitasyon ang usa sa mga mabdos nga si Lizzy Ashleigh alang sa ilang joint party uban sa laing tulo ka babaye. Imbis nga magdumugay, magbirahanay sa buhok, o mag-giyera sa social media, nagmalipayon pa hinuon ang lima ka mabdos sa ilang video ug miingon nga dawat matod pa nila ang usag-usa isip usa ka dako ug “modernong pamilya” karong panahona.
Bisan og nakadawat kini og batikos sa mga netizens ang maong rapper, daling nanalipod ang iyang manager ug miingon nga ang importante daw, kaya ra ni Will nga sustintuhan ug buhion ang lima niya ka umaabot nga anak gikan sa lima ka nagkalain-laing babaye.
Tungod niini, miani og grabeng komento gikan sa mga tsismoso ug tsismosa ang maong balita. Ang uban natingala kung unsaon na lang daw kung magdungan ni og panga-anak, unya magdungan sab og pangita kaniya labi na kung magdungan og hilak ang mga gagmayng bata sa tunga sa kagabhion. Matod pa sa usa ka netizen, “Kami gani nga usa ray anak, maglisod na og tulog, unsa na kaha kong magdungan og hilak ang lima ka baby.
Photo Courtesy: New York Post
