Patay ang duha ka giingong opisyal ug miyembro sa Communist Terrorist Group (CTG) human sa upat ka serye sa sunod-sunod nga engkwentro batok sa kasunduluan kagahapon, Hunyo 21, 2026, didto sa mga utlanan sa Cabanglasan ug Malaybalay City, Bukidnon.
Giila ang mga napatay nga silang Romeo Manpinsahan alyas “Kakoy”, nga maoy commander sa HQF Neo ubos sa North Central Mindanao Regional Committee (NCMRC), ug si Edward Pantandun alyas “Wando”, nga usa ka team leader sa grupo. Narekober usab sa mga sundalo gikan sa maong operasyon ang duha ka tag-as nga kalibre sa armas ug uban pang personal nga kagamitan sa mga rebelde.
Gibutyag sa exclusive nga pakighinabi sa Juander Radyo Malaybalay kang Brigadier General Seigfred C. Tubalado, Commander sa 403rd Infantry Brigade nga nagsugod ang engkwentro sa kadlawon sa Sitio Tagip-tagip, Barangay Poblacion sa Cabanglasan diin unang napatay si alyas Wando sa pwersa sa Special Forces Battalion ubos sa pagpanguna ni Lt. Col. Bautista.
Gisundan kini sa hot-pursuit operations sa 1st Special Forces Battalion ug sa 8th Infantry Battalion nga miresulta pa sa dugang mga pinusilay sa hapon didto sa Sitio Nalumosan, Barangay Silae, Malaybalay City, diin didto na napatay si alyas Kakoy. Upat ka batalyon ubos sa 403rd Infantry Brigade ang kasamtangang gi-deploy sa kabukiran aron hingpit nga gukdon ang nabilin pang dili maminos sa 20 ka mga miyembro sa grupo nga gipangulohan sa usa ka babaye nga nailang si alyas “Reda”.
Nanawagan usab ang heneral sa mga residente sa Cabanglasan ug Malaybalay City nga dili mabalaka ug magpabiling kalmado tungod kay “surgical” ug mabinantayon ang ginahimo nga operasyon sa mga sundalo aron mapanalipdan ang mga sibilyan.
Photo Courtesy: 4th ID Philippine Army
