Misaka ngadto sa 28 ka mga insidente sa sunog ang natala sa probinsya sa Bukidnon niadtong bulan sa Mayo 2026, mas taas kon itandi sa 16 ka kaso sa samang panahon niadtong tuig 2025.
Sa esklusibong pakighinabi sa Juander Radyo Malaybalay kang Senior Fire Officer II Rene R. Rubillos, Spokesperson sa BFP-Bukidnon, gibutyag niini nga ang grabeng kainit sa panahon ang usa sa mga posibleng hinungdan sa maong pagsaka. Samtang sa laing bahin, nakatala usab og pag-ubos sa kaso sa sunog ning bulan sa Hunyo diin lima pa lang ka insidente ang narekord hangtod sa tunga-tunga sa bulan, mas ubos sa siyam ka kaso niadtong miaging tuig.
Aron mapugngan ang dugang kalamidad, gipakusgan karon sa mga lokal nga fire station sa probinsya ang implementasyon sa “Oplan Ligtas na Pamayanan” pinaagi sa paghimo og Community Fire Protection Plan aron matino ang mga fire hazard sa matag lungsod ug siyudad. Gi-organisar usab ang Community Fire Auxiliary Group (CFAG) sa mga barangay nga gilangkuban sa mga barangay opisyal ug lider sa purok isip kaabag ug force multipliers sa ahensya. Padayon usab ang ilang gihimo nga mga lecture, information drive, ug house-to-house survey aron masusi ang mga electrical installation sa mga panimalay.
Nanghinaot ang BFP nga pinaagi niining walay hunong nga kampanya ug sa kooperasyon sa komunidad, hingpit nang moubos ang mga kaso sa sunog sa tibuok Bukidnon aron masiguro ang kaluwasan sa tanan.
Photo Courtesy: BFP-Bukidnon
