Nagdeklara og state of emergency si Bolivian President Rodrigo Paz human sa pipila ka adlaw nga mapait nga mga lihok-protesta sa nasod tungod sa pagsaka sa presyo sa mga batakang palaliton ug nagpadayong krisis sa pulitika. Gumikan niini, gipalihok na sa presidente ang pwersa sa kapulisan ug militar aron mabalik ang kahapsay ug kalinaw, samtang gipasalig niya nga ang maong lakang gihimo aron mabalik sa normal ang kahimtang sa nasod nga kasamtangang gigubot sa mga organisadong grupo.
Ang maong mga protesta gipangulohan sa mga dumalayeg ni kanhi President Evo Morales, kinsa kusganong nanawagan kang Paz nga mokanaog na sa iyang puwesto. Tungod sa maong kagubot, daghang mga nag-unang kalsada ang gipisat ug gisirad-an sa mga nagprotesta, nga miresulta karon sa grabeng kakuwangon sa suplay sa pagkaon, lana, ug mga tambal sa nagkadaiyang bahin sa Bolivia.
Bisan pa man sa grabeng presyur gikan sa oposisyon, nagpabiling lig-on ang baruganan sa administrasyong Paz ug gipasalig nga panalipdan ang seguridad sa publiko batok sa mga dautang elemento. Gilauman nga sa pagdeploy sa mga sundalo ug kapulisan, mahatagan og dinaliang solusyon ang kahuot sa mga agianan aron makasulod na pag-usab ang mga nag-unang panginahanglanon sa mga lungsoranon
Photo Courtesy:CBC
