Nangita karon og kaabag sa pribadong sektor ang kagamhanan aron pondohan ang gikinahanglang P18 bilyon alang sa pagtukod sa unang tulo ka offshore wind terminals sa nasod nga nagtumong sa pagpausbaw sa suplay sa enerhiya.
Sumala sa Philippine Ports Authority (PPA), ginalihok na nila ang framework alang sa maong mga proyekto nga mag-convert o maghimo sa pipila ka mga dunggoanan ngadto sa mga offshore wind farm, diin gi-estudyoan na karon ang Port of Sta. Clara sa Batangas ug Port of Currimao sa Ilocos Norte pinaagi sa Public-Private Partnership (PPP).
Sa pagkakaron, na-award na sa PPA ang kontrata alang sa unang phase sa kalamboan didto sa Port of Mercedes sa Camarines Norte nga nagkantidad og P2.27 bilyon ngadto sa joint venture sa Khan Kho Chi Construction ug SB Construction Corp.
Apan gibutyag ni PPA General Manager Jay Santiago nga temporaryo una kining naka-hold samtang gikompleto pa sa ahensya ang mga dokumento ug gihusay ang pag-consolidate sa mga yuta alang sa construction site.
Photo Courtesy: Iberdrola
