Nasakmit ang mokabat sa Php6.28 million nga smuggled nga sigarilyo ug nasikop ang usa ka indibidwal pinaagi sa gipahigayon nga checkpoint operation sa kapulisan sa Barangay Gatas, lungsod sa Kalawit, Zamboanga del Norte sayo sa buntag kagahapong adlawa, Hunyo 19.
Gihimo ang maong operasyon pinaagi sa mga personahe sa 2nd Provincial Mobile Force Company (PMFC) sa koordinasyon sa Kalawit Municipal Police Station ug Provincial Intelligence Unit of Zamboanga del Norte Police Provincial Office.
Samtang nagpahigayon sa routine inspection, namatikdan sa mga operating personnel sang kadudahang lihok sa cargo truck driver kinsa kalit nga nagpakusog ug dagan sa gimaneho nga cargo truck ug misulay pag lahos sa gipahigayong checkpoint apan napugngan kini sa mga personahe.
Giila ang driver nga 36-anyos, minyo ug residente sa Barangay Zambowood, Zamboanga City.
Sa pag-inspeksyon, nadiskubrehan nga nagkarga ang maong cargo truck ug 105 cases ug 230 reams sa klase-klaseng smuggled nga sigarilyo nga nagkantidad ug Php6.280.080.00 base sa Bureau of Customs standad price index.
Ang dinakpan ug mga ebidensya gidala ngadto sa kustudiya sa kapulisan ug mag-atubang sa kasong paglapas sa Republic Act 10643 o Graphic Health Warnings Law.
Photo Courtesy: ZN 2nd PMFC
