Migradwar ang kinatibuk-ang 2,010 ka estudyante sa Bukidnon State University (BukSU) atol sa ilang ika-92 nga Annual Commencement Exercises kagahapon Hunyo 19, 2026 nga gipahigayon sa Bukidnon Sports and Cultural Complex.
Gidala sa maong graduation rites ang tema nga “Future-Ready BukSU: Achieve Excellence, Accelerate Innovation, Empower Generations,” nga nagtumong sa pag-andam sa mga gradwado alang sa mga hagit ug oportunidad sa ilang umaabot nga karera.
Nanguna sa maong batch ang usa ka garbo nga estudyante nga nakakab-ot sa labing taas nga academic distinction isip Summa Cum Laude, dungan sa 36 ka Magna Cum Laude ug 197 ka Cum Laude. Base sa opisyal nga datos sa unibersidad, ang College of Arts and Sciences ang adunay labing daghang migradwar nga miabot sa 555 ka estudyante, gisundan sa College of Business (432), College of Education (396), College of Technology (253), College of Nursing (217), College of Public Administration and Governance (139), ug 18 ka mga bag-ong gradwado gikan sa College of Law.
Ang maong ika-92 nga commencement exercises giila nga usa sa labing dako ug mabulukong kalihokan sa unibersidad karong tuiga. Nahimo kining usa ka emosyonal ug madungganong selebrasyon diin gisaulog sa mga bag-ong gradwado uban sa ilang mga pamilya ang tam-is nga bunga sa ilang mga sakripisyo ug pipila ka tuig nga pagtuon taliwala sa mga kalisod sa akademya
