Naghiusa ang 10th Infantry (Agila) Division sa Philippine Army sa pagpahigayon og seremonyas sa pagbutang og buwak niadtong nakalabay nga adlaw, sa 10ID Heroes Memorial Park, Camp General Manuel T. Yan Sr., isip paghinumdom sa ika-9 nga anibersaryo sa deklarasyon sa pagbawi sa Marawi gikan sa mga terorista.
Gipasidunggan sa maong kalihokan ang kaisog ug sakripisyo sa mga sundalong Pilipino ug uban pang personnel nga nakig-away atol sa pag-atake sa Marawi niadtong 2017, ilabi na kadtong mga namatay sa pagpanalipod sa nasud. Gihatagan usab og pag-ila ang kalig-on sa mga taga-Marawi ug ang panaghiusang paningkamot nga mitultol sa pagkagawasnon sa syudad.
Sumala kang Major General Alvin Luzon, commander sa 10ID, kinahanglan ipadayon sa mga kasamtangang sundalo ang kabilin sa kaisog ug gugma sa nasud nga gipakita sa mga bayani pinaagi sa matinud-anong pagserbisyo. Gipasalig usab sa 10ID nga magpadayon kini sa pagpanalipod sa katawhang Pilipino ug pagmintinar sa kalinaw ug seguridad agig pagpasidungog sa sakripisyo sa mga nangamatay nga bayani.
Photo Courtesy: 10th ID
