Patay ang usa ka miyembro sa LGBTQ human gibusdakan og bato ang ulo sa Purok 4, Barangay Apokon, Tagum City. Giila ang biktima nga si alyas “JOVITH,” 33 anyos, lalaki, ug residente sa Barangay Madaum syudad sa Tagum.
Sumala kang alyas “REYLITO,” 62 anyos, minyo, ug Barangay Tanod sa Barangay Apokon, nakadawat siya og impormasyon gikan sa usa ka duty sweeper bahin sa patay nga lawas nga napalgan sa bakanteng luna daplin sa dalan sa Purok 4, sa giingong lugar. Human niya masuta ang maong impormasyon, dali niining gitawagan ang kapulisan.
Base sa inisyal nga imbestigasyon adunay samad sa ulo nga bahin ang biktima. Samtang usa ka bato nga adunay lama sa dugo ang narekober sa crime scene ug gikonsiderar nga posibleng gigamit sa krimen nga miresulta sa hinanaling kamatayon niini.
Sa pagpadayon sa imbestigasyon sa Tagum PNP, kalabot sa usa ka testigo kinsa giila sa alyas nga “FEAH,” 18 anyos, babaye, ug store attendant duol sa lugar sa insidente, mibutyag nga mga alas 9:00 sa gabii niadtong Oktubre 16, 2026, nag-inom ang biktima uban sa usa ka wala mailhing lalaki sa tindahan diin siya nagtrabaho. Bandang alas 12:00 sa tungang gabii Oktubre 17, 2026, mibiya ang duha sa tindahan ug milakaw paingon sa lugar diin ulahing nakit-an ang biktima ug pipila lamang ka minuto ang milabay, mibalik sa tindahan ang maong kainom nga lalaki.
Matod sa testigo, iyang namatikdan nga adunay mga lama sa dugo ang T-shirt niini hinungdan nga midagan siya padulong sa sulod sa tindahan. Samtang milakaw usab ang suspek sa wala matinong direksyon.
Subay sa nagpadayong imbestigasyon, nakakuha og impormasyon ang mga personahe sa Intelligence unit gikan sa usa ka concerned citizen nga midumili sa pagpadayag sa iyang identidad. Naghatag kini og impormasyon ug litrato sa usa ka lalaki nga giingong kauban sa biktima sa wala pa ang insidente.
Gipakita ang maong litrato kang alyas “FEAH,” kinsa miila sa tawo isip mao ang lalaki nga kauban sa biktima sa tindahan sa wala pa ang panghitabo.
Nasayran nga ang maong tawo giila sa alyas nga “DRE” kinsa hingpit nga nadakpan sulod sa ward sa Davao Regional Medical Center (DRMC) pinaagi sa gihimong dragnet operation sa Tagum PNP. Personal nga panaglalis ang posibleng motibo sa maong krimen, apan padayon pang gisusi sa kapulisan ang ubang anggulo aron matino ang tinuod nga hinungdan sa kamatayon sa biktima.
Gipailawom na usab sa hustong pagdumala ug pagproseso ang mga narekober nga ebidensya alang sa dugang imbistigasyon ug pagpasaka sa tukmang kaso.
