Gipangandaman na sa Bureau of Fire Protection (BFP) Iligan City alang sa pagsaulog sa National Disaster Resilience Month karong Hulyo 2026. Matud ni SFO4 Richard Cartin, kasagaran nga mosulod ang mga bagyo sulod sa bulan sa Hulyo, maong importante nga andam ang tanang sektor sa komunidad batok sa posibleng mga kalamidad.
Gibutyag ni Cartin nga nakigkoordinar na ang BFP Iligan sa Iligan City Disaster Risk Reduction and Management Office (ICDRRMO) alang sa nagkadaiyang programa ug kalihokan nga ipahigayon sa tibuok bulan.
Tumong sa maong mga kalihokan nga mapalig-on ang kahibalo sa katawhan sa pagpangandam ug pagpanalipod sa ilang kaugalingon ug pamilya panahon sa mga emerhensiya ug kalamidad.
Gipasiugda usab ni Cartin ang kahinungdanon sa pagkat-on gikan sa nangaging mga kasinatian, sama sa nahitabong sunog atol sa paghapak sa miaging bagyo.
Tungod niini, lakip ang BFP Iligan sa mga ahensiyang magtinabangay aron masiguro ang kaluwasan ug kahandam sa komunidad.
Sa tibuok bulan, ipahigayon ang nagkadaiyang programa ug aktibidad nga magpasiugda sa disaster preparedness, climate change adaptation, community resilience, ug pagpalambo sa kahibalo sa publiko.
Pinaagi sa hiniusang paningkamot sa gobyerno, pribadong sektor, ug komunidad, gilauman nga mapalig-on ang kahandam sa katawhan ug matukod ang mas luwas, lig-on, ug andam sa kalamidad nga mga komunidad.
