Gipahimangnoan sa Civil Security Unit (CSU) ang publiko, ilabina ang mga kabatan-onan sa mga barangay sa Maria Cristina, Suarez ug Tomas Cabili, nga likayan ang pagsulod sa lugar sa National Steel Corporation (NSC) nga walay opisyal nga pagtugot.
Matud ni Marlon A. Clapano, head sa Security Management Division sa Iligan, hugot nga gidili ang pagsulod sa maong lugar tungod kay adunay mga kabtangan ug pasilidad nga gipanalipdan.
Gipasabot ni Clapano nga ang lokal nga kagamhanan sa Iligan adunay giya ug mga patakaran nga kinahanglang sundon sa bisan kinsang gustong mosulod sa NSC compound.
Kinahanglan una nga mosanghid ug mokuha og clearance gikan sa City Mayor’s Office pinaagi kang Chief of Staff Bernie Padilla aron marekognisa ug matugotan ang pagsulod.
Gipasidan-an usab sa CSU nga ang mga walay opisyal nga permiso dili gayod tugotan sa pagsulod sa maong lugar aron maseguro ang kaluwasan sa tanan ug maprotektahan ang mga kabtangan sulod sa compound.
