GIPALIG-ON sa City Security Unit (CSU) ang pagpanalipod sa mga pasilidad ug kabtangan sa National Steel Corporation (NSC) human opisyal nga mapailalom sa pagdumala sa Local Government Unit (LGU) sa Iligan sugod niadtong Abril 1, 2026.
Matud ni Marlon A. Clapano, head sa Security Management Division, pinaagi sa memorandum order nga gipagawas ni Mayor Frederick W. Siao, ang mga personnel sa LGU Security maoy gisaligan sa pagbantay sa maong pasilidad.
Sa pagkakaron, adunay 66 ka mga security personnel nga gi-assign sa 97 ka ektaryang yuta sa NSC compound. Apan, ang prayoridad nga gibantayan mao ang duha ka importanteng pasilidad—ang Cold Mill, Administration Office ug Gymnasium.
Gibutyag ni Clapano nga adunay mga indibidwal nga misulay sa pagsulod sa compound aron mangawat og mga bililhong metal ug mga scrap materials.
Tungod niini, kapin sa 20 ka mga tawo na ang nadakpan ug gipasakaan og kaso tungod sa paglapas sa balaod.
Gipasiugda usab ni Clapano nga kabahin sa mandato sa CSU ang pagbantay ug pagpanalipod sa tanang assets and liabilities sa Syudad sa Iligan aron masiguro nga mapreserbar ug mapahimuslan kini sa hustong paagi.
