Gipahibalo ni U.S. President Donald Trump nga hingpit nang maablihan ang Strait of Hormuz karong Biyernes human sa panagkasabot tali sa Estados Unidos ug Iran nga tapuson ang ilang panagbangi sa Middle East.
Matod ni Trump, sugdan na usab ang normal nga paglihok sa mga barko ug pagbiyahe sa mga kargamento sa lana pinaagi sa maong estratehikong agianan, nga maoy usa sa labing importante nga ruta sa global nga suplay sa petrolyo.
Una nang gitaho nga adunay mga oil tanker ug cargo ships nga nakasulod na sa maong ruta human sa pagkunhod sa tensyon sa rehiyon.
Samtang, gikatakda usab nga pirmahan sa Switzerland ang kasabutan sa kalinaw tali sa Estados Unidos ug Iran, nga gilauman nga makatabang sa pagpasig-uli sa kalig-on sa rehiyon ug sa internasyonal nga merkado sa enerhiya.
