Misaka ang presyo sa bulawan samtang mihagsa usab ang presyo sa lana human nagkasabot ang Estados Unidos ug Iran sa usa ka kasabutan sa kalinaw nga gipangulohan sa Pakistan. Kini nga kalamboan naghatag og kahupayan sa kalibutan taliwala sa nagpadayong tensyon sa Middle East. Tungod niini, mius-os og hapit upat ka porsyento ang presyo sa Brent crude futures ug mikunhod ngadto sa ubos sa USD 84 kada bariles gikan sa kapin USD 87, human gipahibalo nga pirmahan sa Washington ug Tehran ang kasabutan karong Hunyo 19 didto sa Switzerland human sa kapin tulo ka bulan nga panagbangi.
Samtang, misaka og 1.8 porsyento ang spot gold ngadto sa USD 4,297.42 kada ounces ang pinakataas nga ang-ang niini sukad niadtong Hunyo 9. Misaka usab og 1.9 porsyento ang US gold futures sa bulan sa Agosto nga anaa na karon sa USD 4,318.10 kada onsa.
Sumala sa mga eksperto o analyst, tungod niining kasabutan, nawala ang kabalaka sa publiko ug mga negosyante bahin sa posibleng pagkaatrasado sa suplay sa lana ug ang kalit nga pagsaka sa implasyon o presyo sa mga palitonon. Kini ang nag-unang rason sa pag-ubos sa presyo sa lana ug sa positibong reaksyon sa mga merkado sa panalapi o financial markets sa tibuok kalibutan.
Photo courtesy: Foreign Policy
