Usa ka bag-ong teknolohiya gikan sa China ang nakapadani ug nakapakatawa sa daghang netizens human gipaila ang usa ka AI-powered robot toilet nga maoy moduol mismo sa higdaanan sa tag-iya kung kinahanglanon na kini.
Gitawag kini og Xiaoban Smart Toilet, usa ka autonomous robot toilet nga gihimo sa kompanyang Yueban ug gipakita atol sa Shanghai International Aged Care Expo.
Nasangkapan kini og artificial intelligence aron makalikay sa mga babag sa dalan, makabiyahe nga walay tabang sa tawo ug makahimo pa gani sa kaugalingong paglimpyo human magamit.
Tumong sa maong imbensyon ang pagtabang sa mga senior citizen ug mga tawo nga adunay kalisod sa paglihok. Apan alang sa ubang netizens, lahi ang ilang panglantaw sa maong teknolohiya.
Matod sa uban, “Dili na kinahanglan modagan padulong sa CR, kay ang CR na mismo ang modagan paingon nimo!”
Samtang ang uban nangomedya nga basin umaabot ang panahon nga ang kasilyas na ang mangutana, “Sir, sigurado naka? Paingon na ko diha!”
Bisan kataw-anan paminawon, tinuod nga gihimo ang maong robot toilet aron mas mapadali ang kinabuhi sa mga tawo nga adunay espesyal nga panginahanglan.
Photo courtesy: TechEblog
