Nanawagan ang Malacañang sa mga magbabalaod nga tutukan ang trabaho ug unahon ang kaayohan sa katawhan human gipatawag ni Presidente Ferdinand Marcos Jr. ang espesyal nga sesyon sa Kongreso karong Hunyo 17.
Matud pa ni Palace Press Officer Undersecretary Claire Castro, ang klarong tuyo sa presidente sa pagpatawag sa special session mao ang paghimong paspas sa pagpasar sa mga balaudnon nga makaayo sa mga Pilipino.
Apil na niini ang paghisgot sa Anti-Political Dynasty Law, lakip sa ubang mga balaodnon nga makapalig-on sa social protection ug makapauswag sa serbisyo sa gobyerno.
Gihatagan og gibug-aton ni Castro nga dili mamahimong malangan, ang mga balaodnon nga adunay direktang epekto sa kinabuhi sa mga Pilipino, ilabina taliwala sa mga hagit sama sa mga kalamidad, taas nga panginahanglan alang sa social services, ug ang panginahanglan sa pagpalapad sa access sa edukasyon ug healthcare.
Sa nasayran, daan na nga nanawagan si Presidente Marcos niadtong Independence Day nga pilion ang kaayohan sa nasud kaysa interes sa pipila, ug magpabiling matinud-anon sa katungdanan, sa Konstitusyon, ug sa katawhang Pilipino.
Photo courtesy: thechronicle.com.ph
