Patay ang asawa samtang naangol ang bana dihang napusilan sa mga sundalo human naalaan nga sakop sa New People’s Army (NPA) sa Sitio Mahayag, Brgy. St. Peter, Malaybalay City, Bukidnon niadtong Lunes Hunyo 15, 2026. Giila ang namatay nga si Nenita Buscaga nga taga Purok 5 sa nahisgutang lugar.
Kini ang gikumpirma ni 4ID Philippine Army Spokesperson Lt. Col. Joe Patrick Martinez sa exclusive nga pakighinabi sa Juander Radyo Malaybalay diin nakita sa tropa nga adunay dalang armas ang mga biktima busa gitawag ug gipahunong apan wala kini naminaw og dayong nanagan palayo sa lugar. Giingong naniguro ang mga sundalo gumikan kay naa nay insidente nga pagpang-ambush sa lugar hinungdan sa pagpamusil.
Narekober sab sa posisyon sa mga biktima ang armas nga 22 riffle with homemade scope. Nasuta nga sibilyan ang mga biktima ug walay kalabutan sa mga armadong grupo nga giingong naglihok sa lugar. Ug ang armas nga narekober sa ilaha gamit lamang sa pagpang hunting.
Dugang pa ni Martinez nga gilayong gitunolan sa tabang sa kasundaluhan ang pamilya sa mga biktima lakip na niini ang paghatag og scholarship ngadto sa ilahang mga anak.
Sa karon girelieve na ang duha ka sundalo nga giingong nakapusil samtang nagpadayon ang lawom nga imbestigasyon sa hitabo.
