Nikunhod sa sobra 4% ang presyo sa lana kagahapong adlawa human nga gianunsyo sa Estados Unidos ug Iran ang kasabutan aron tapuson ang ilang panagbangi ug ablihan pag-usab ang Strait of Hormuz.
Niubos og 4.39% ang West Texas Intermediate sa $81.15 matag bariles sa trading sa Tokyo human sa report nga nagkasabot ang US ug Iran sa dali ug permanenteng paghunong sa mga operasyong militar sa tanang aspeto lakip ang Lebanon.
Gikunpirmar ni US Pres. Donald Trump nga kompleto na ang kasabutan ug gianunsyo sab niini nga ablihan pag-usab ang Strait of Hormuz, usa ka importanteng ruta nga agianan sa sobra 20% sa pangkalibutan nga suplay sa lana.
Gipamahayag sab niini ang pagkuha sa naval blockade sa Estados Unidos sa rehiyon ug giawhag ang mga barko sa tibuok kalibutan nga ipadayon ang normal nga operasyon sa paglawig alang sa pagdala og lana.
Sumala sab sa Pakistan nga nagsilbing nagpatunga, ang kasabutan giila nga unang lakang paingon sa kalinaw ug dili pa pinal samtang nagtakpa og pormal nga proseso sa beripikasyon sa Swizerland.
Photo courtesy: CNN International
