Gipanday na karon sa buhatan ni Konsehal Des Dahino ang usa ka ordinansa nga nagtumong sa paghatag og libreng access sa mga serbisyo sa pagtambal ug therapy alang sa mga batang adunay special needs.
Matod ni Konsehal Dahino, ang giproposang balaudnon gitumong aron matabangan ang mga pamilya nga adunay mga anak nga nagkinahanglan og espesyal nga pag-atiman apan adunay kalisod sa pagbayad sa mga medical assessment ug therapy services.
Lakip sa mga mahimong makabenepisyo sa programa ang mga kabataan nga adunay kondisyon sama sa autism ug uban pang learning disabilities nga nagkinahanglan og regular nga therapy ug espesyal nga interventions.
Gipasabot ni Dahino nga pinaagi sa ordinansa, mas daghang kabataan ang makadawat sa hustong pag-atiman ug suporta nga makatabang sa ilang paglambo ug pag-angkon og mas maayong kalidad sa kinabuhi.
Gilauman nga kung maaprobahan, ang ordinansa mahimong dakong tabang sa mga ginikanan ug pamilya nga nag-atiman sa mga batang adunay special needs sa dakbayan sa Cagayan de Oro.
Photo courtesy: City Councilor Des Dahino
