Gipahibalo sa National Commission of Senior Citizens nga mahimo nang madawat sa mga kwalipikadong benepisyaryo sa Expanded Centenarians Act (ECA) ang ilang cash gift pinaagi sa digital o electronic fund transfer.
Ubos sa balaod, ang mga senior citizen nga makaabot sa edad nga 80, 85, 90 ug 95 anyos makadawat og P10,000 nga cash gift, samtang ang moabot sa 100 anyos makadawat og P100,000.
Aron makadawat sa benepisyo pinaagi sa electronic transfer, kinahanglan nga bisitahon sa aplikante ang opisyal nga website sa NCSC aron ma-download ang updated Claim Form, o mahimong kuhaon diha sa Office for Senior Citizens Affairs (OSCA) ug Local Social Welfare and Development Office (LSWDO).
Kon makumpleto na sa benepisyaryo ang form, kinahanglan pillion niini ang paagi sa pagdawat sa cash gift, sama sa bank account, Landbank account, verified GCash account, o pinaagi sa Palawan Pawnshop ug Palawan Express.
Kinahanglan usab isumite ang PSA birth certificate, National ID o digital NCSC ID, whole body picture, ug uban pang gikinahanglang dokumento sa OSCA o LSWDO.
Matud sa NCSC, ang mga aplikante nga maaprubahan pahibaloon pinaagi sa tawag o text gikan sa regional office, hinungdan giawhag ang mga benepisyaryo nga siguruhong aktibo ug magamit ang ilang contact number ug napiling bank o GCash account aron walay problema sa pagdawat sa cash gift.
Photo Courtesy: INQUIRER
