Nakadawat og livelihood kits ang 109 ka parolees ug probationers sa Rehiyon 9 gikan sa Department of Labor and Employment (DOLE) 9 isip kabahin sa programa sa gobyerno aron magamit nila alang sa reintegrasyon.
Matud ni DOJ-PPA 9 Regional Director Amites Butiong, sa tibuok rehiyon aduna silay kinatibuk-ang 8600 ka mga kliyente nga mga parolees ug probationers apan 190 na ang kinatibuk-ang nahatagan ug livelihood kits sukad sa pagsugod sa programa sa DOLE 9.
Gisaysay ni RD Butiong, ang maong mga livelihood nga natunol sa DOLE 9 ngadto sa mga benepisyaryong mga parolees ug probationers misumatotal na sa P7,744,000.00.
Gisaysay ni RD Butiong, pinaagi sa maong tabang panginabuhian, gilauman nga makasugod o makapalambo sila sa ilang panginabuhi aron malikayan ang pagbalik sa mga kalihokang supak sa balaod.
Sumala pa niya, ang inisyatiba sa DOLE 9 nagpakita sa padayon nga suporta sa gobyerno sa rehabilitasyon ug paghatag og ikaduhang higayon sa mga parolees ug probationers pinaagi sa lig-on nga panginabuhian.
Gilauman usab nga ang maong programa makatabang sa pagpalig-on sa ilang papel isip produktibong miyembro sa katilingban ug makatampo sa ilang paglambo.
