Giklaro sa TESDA-10 nga dili tanan kurso nga ilang gi-offer libre alang sa mga kwalipikado, ilabina ang mga programa nga ginatanyag pinaagi sa mga pribadong institusyon nga kauban sa ahensya.
Matod ni TESDA-10 Regional Director Rafael Abrogar II, adunay mga kurso nga libre ilalom sa scholarship programs sa gobyerno, apan dili tanan mahimong maapil niini tungod sa limitadong pondo nga gigahin alang sa mga programa.
Gipasabot ni Abrogar nga ang gidaghanon sa mga benepisyaryo sa scholarship ug libreng training nagdepende sa budget nga anaa sa gobyerno matag tuig.
Bisan pa niini, gidasig sa TESDA-10 ang publiko nga moduol sa ilang mga opisina aron mahibaluan kung unsang mga kurso ang adunay scholarship ug libre nga training, ingon man ang mga kwalipikasyon aron maka-avail.
Padayon usab ang ahensya sa paghatag og kahigayonan sa mga gustong makakat-on og bag-ong kahanas aron mapalambo ang ilang kwalipikasyon ug madugangan ang oportunidad sa trabaho ug panginabuhian.
Photo courtesy: TESDA Region X/ Facebook
