Miubos og dako ang ihap sa mga batang mamumuo sa nasod gikan sa 828,000 niadtong 2022 ngadto sa 509,000 niadtong 2024 tungod sa gipakusog nga kampanya sa kagamhanan batok sa child labor, sumala sa Department of Labor and Employment (DOLE). Matod sa DOLE, bunga kini sa mas lig-on nga mga programa sa gobyerno ug pagtinabangay sa nagkalain-laing sektor aron mailayo ang mga bata sa mapahimuslanong pagtrabaho ug maseguro nga nagpabilin sila sa tunghaan.
Dungan sa paghandom sa Adlaw sa Kagawasan, nanawagan si Labor Secretary Francis Tolentino sa publiko nga motabang sa pagduso sa usa pa ka matang sa kagawasan alang sa mga kabatan-onan—ang kagawasan gikan sa child labor.
Gihatagan usab og gibug-aton sa kalihim ang importansya sa hiniusang lihok samtang nakighiusa ang Pilipinas sa paghandum sa World Day Against Child Labor 2026 ubos sa temang “Red Card to Child Labor: Fair Play for Children, Decent Work for Adults.”
Sumala kang Tolentino, nagdasig ang tema sa mas estrikto nga pagpatuman sa mga polisiya ug programa nga nagtumong sa pagpugong ug hingpit nga pagwagtang sa child labor sa nasod.
Isip kabahin sa usa ka bulan nga kampanya, nagpahigayon ang mga buhatan sa DOLE sa tibuok nasod og nagkadaiyang kalihokan sama sa information and advocacy drives, service caravans, oryentasyon bahin sa Republic Act No. 9231, pagpang-apod-apod og livelihood assistance, gift-giving ubos sa Project Angel Tree, DOLEkula Film Festival, ug mga Run for a Cause.
Photo courtesy:Human Right Watch
