Nahagsa ang usa ka military transport aircraft sa Indian Air Force samtang padulong motugpa sa usa ka air force station sa amihanang-sidlakang bahin sa India niadtong Sabado, Hunyo 13.
Sa pamahayag sa Indian Air Force, ang Russian-made nga Antonov An-32 naaksidente samtang molapag sa siyudad sa Jorhat sa estado sa Assam.
Wala pa maghatag og detalye ang militar kalabot sa ihap sa mga sakay sa eroplano ug kon aduna ba’y naangol sa insidente.
Sumala sa Air Force, nagtukod na sila og usa ka court of inquiry aron masuta ang hinungdan sa pagkahagsa sa maong eroplano. Ang Antonov An-32 usa ka twin-engine turboprop aircraft nga gidesinyo aron makalupad sa tag-as nga mga dapit ug sa lisod nga kondisyon sa panahon.
Moabot sa gibana-banang 100 ka yunit sa eroplano ang ginagamit sa Indian Air Force alang sa paghatod sa mga suplay militar ug ayuda sa mga layong dapit, ilabi na sa mga kabukiran sa nasod.
Nagpadayon pa ang imbestigasyon sa mga awtoridad sa maong insidente.
Photo courtesy: infotechindi.com
