Gilauman nga makakuha og inisyal nga pamuhunan nga mokabat sa $10 bilyon ang Pilipinas pinaagi sa gipangandoy nga artificial intelligence (AI) hub nga paluyohan sa Estados Unidos.
Sumala ni Joshua Bingcang, ang pangulo sa Bases Conversion and Development Authority (BCDA), kini nga proyekto nga pagatukoron sa usa ka 4,000-acre nga yuta duol sa Clark Freeport Zone maoy mamahimong bersyon sa nasod sa “Silicon Valley.” Gilauman nga makatabang kini sa pagbuhi pag-usab sa ekonomiya sa nasod nga kasamtangang naluya tungod sa epekto sa gubat sa Iran.
Kini nga industrial hub kabahin sa alyansa nga “Pax Silica” nga gipangulohan sa Washington kauban ang ubang mga nasod sama sa Australia, India, Israel, Japan, ug UK, nga nagtumong sa pagpa-ubos sa pagsalig sa mga supply chain nga ginalihokan sa China. Gawas sa mga pasilidad sa AI ug data centers, mag-host usab ang dapit og mga proyekto sa green energy, semiconductor, ug logistika. Tinguha sa kagamhanan sa Pilipinas nga selyohan ang kasunduan uban sa US State Department karong tuiga, diin naglakip kini sa kapilian nga hatagan ang US og lease sa yuta nga molungtad hangtod sa 99 ka tuig.
Aron masiguro ang kalamposan sa proyekto, gipahayag ni Bingcang nga kinahanglang lig-on ug dili maapektuhan sa kausaban sa politika ang kontrata aron magpabiling masaligon ang mga langyawng investors. Gihisgutan usab niya nga usa kini ka bulawanong kahigayonan nga dili angay palabyon tungod kay kon wala pa gidawat sa Pilipinas ang tanyag, lagmit adto kini gipang-atubang sa mga nasod sama sa Vietnam o Malaysia. Niaging bulan, mibisita na sa dapit ang mga opisyal sa US ug pipila ka dagkong ehekutibo sa negosyo, lakip na ang tsirman sa Foxconn, nga nagpakita sa kakomitado sa duha ka nasod sa pagpatuman niini.
Photo courtesy: Linkedin/ Daily Tribune
