Nagpahayag si Senador Joel Villanueva nga andam siyang motambong sa usa ka espesyal nga sesyon sa Kongreso kon kini ipatawag ni Presidente Ferdinand Marcos Jr., aron matubag ang mga importanteng isyu sama sa ayuda alang sa mga naapektuhan sa linog sa Mindanao ug ang nalangan nga promosyon sa mga opisyal sa military, tungod kay ang krisis sa senado dili angay makababag sa serbisyo publiko.
Sa iyang mensahe atol sa usa ka religious gathering sa Jesus Is Lord Church, sumala ni Villanueva nga mas labaw ang iyang katungdanan isip senador kaysa sa mga panaglalis sa politika nga karon nagpalibot sa Senado.
Matod pa niya, sa panahon nga daghang hagit nga giatubang ang nasud, dili angay nga maparalisar ang serbisyo publiko tungod sa mga away sa politika. Gipasiugda usab niya nga kon adunay espesyal nga sesyon, iyang iprayoridad ang resolusyon alang sa igo nga pondo sa mga biktima sa linog sa Mindanao ug ang pag-apruba sa mga pending nga balaodnon ug kumpirmasyon sa mga opisyal sa gobyerno.
Samtang nagpadayon ang panaglalis sa liderato sa Senado, giingon usab ni Senador Panfilo Lacson nga importante nga motambong ang tanang senador sa posibleng espesyal nga sesyon aron matubag ang mga nag-unang panginahanglan sa nasud ug mapadayon ang mga buluhaton nga natanggong tungod sa krisis sa liderato.
Nagpabilin nga wala pay opisyal nga pahibalo gikan sa Malacañang kabahin sa posibilidad sa pagtawag og espesyal nga sesyon sa Kongreso.
Photo Courtesy:wikipedia
