Mosaka pa ang maayong balita alang sa mga Local Government Units (LGUs) sa tibuok nasud human gipahibalo sa Department of Budget and Management (DBM) nga modako pa ang ilang National Tax Allotment (NTA) ngadto sa ₱1.32 trilyon sa sunod nga tuig.
Kini mas taas og 10.9 porsyento kumpara sa ₱1.19 trilyon nga alokasyon sa tuig 2026, ug gilauman nga gamiton sa mga LGU alang sa mga prayoridad nga programa sama sa imprastraktura, serbisyong sosyal, kahimsog, edukasyon, ug kahandaan sa kalamidad.
Sumala sa DBM, ang maong pondo gikan sa aktuwal nga koleksyon sa buhis sa Bureau of Internal Revenue, Bureau of Customs, ug Bureau of the Treasury sa tuig 2024, ug gibase usab sa populasyon sa kada probinsya, syudad, munisipyo, ug barangay.
Sa pagbahin sa alokasyon, ang mga munisipyo makadawat sa pinakadako nga bahin, gisundan sa mga syudad, probinsya, ug mga barangay. Ang rehiyon sa Calabarzon ang nakadawat sa pinakadako nga regional allocation, samtang ang Cordillera Administrative Region ang pinakagamay.
Gipahimangnoan usab sa DBM ang mga LGU nga kinahanglan mogahin og dili moubos sa 20 porsyento sa ilang NTA alang sa development projects, ug sundon ang ubang mandato sama sa pondo para sa Sangguniang Kabataan ug mga programa alang sa gender and development, senior citizens, PWDs, ug uban pa.
Matod pa sa DBM, ang responsibilidad ug pagtubag sa hustong paggasto sa pondo anaa gayud sa mga local chief executives ug ubang opisyal sa LGU, subay sa balaod ug implementasyon sa Mandanas-Garcia ruling nga nagpalapad sa share sa LGUs sa national taxes.
Photo Courtesy: adobe stock
