Gipresentar ni Mayor Jay Warren Pabillaran ang dako ug dugayng plano sa Malaybalay City alang sa pagtukod og usa ka Innovation Park ug Business Center sulod sa 15 ka ektaryang yuta nga gipalit sa lokal nga panggamhanan.
Nagtumong ang maong dakong proyekto sa pagpalambo sa ekonomiya ug sa pagmugna og dugang nga mga oportunidad sa panginabuhian alang sa mga lumulupyo sa syudad.
Kini ang gipadayag sa Mayor atol sa pagsaulog ika-149 nga adlaw pagmugnag syudad kung asa ang maong dapit nga nahimutang ibabaw sa rehabilitation center pagatukoran og Convention Center, Innovation and Enterprise Center, Eco-Recreation Park, ug terminal. Lakip sad sa plano ang pagbutang og mixed residential ug commercial areas aron mas mamahimong madasigon ug mabuhi ang patigayon sa maong lugar
Nasayran nga ang napulo ka ektarya sa maong yuta napalit pinaagi sa savings sa syudad niadtong tuig 2025 nga miabot ngadto sa hapit P70 milyones pesos.
Samtang, ang nahibiling lima ka ektarya gigahinan ug gipalit pinaagi sa pagkuha gikan sa regular nga pondo sa lokal nga kagamhanan.
Bisan pa man nga giangkon sa mayor nga kini usa ka dugayng plano nga posible pang matuman sulod sa pipila ka tuig o dekada, giisip gihapon kini nga usa ka mahinungdanong lakang alang sa unahan ug mas nindot nga kaugmaon sa tibuok Malaybalay City.
Photo Courtesy: Mayor Warren Pabillaran
