Nagpadyag pahasubo ang Malacañang ngadto sa pamilya ug mga higala sa duha ka Ateneo de Manila University basketball players nga namatay atol sa usa ka team-building activity sa Dipaculao, Aurora niadtong Hunyo 8.
Matod ni Palace Press Officer Claire Castro, gitinguha ni Presidente Ferdinand Marcos Jr. nga mapaspasan ang imbestigasyon aron masuta ang tinuod nga hinungdan sa maong trahedya.
Samtang adunay mga espekulasyon nga posibleng adunay kalabotan sa hazing ang nahitabong kalihokan, gipasabot sa Malacañang nga dili angay magdali og paghukom hangtod wala pa mahuman ang opisyal nga imbestigasyon.
Ang mga biktima giila nga sila si Rene Clert Baterbonia, 19-anyos ug incoming Blue Eagles rookie, ug si Divine Adili, 21-anyos nga Nigerian center sa Ateneo men’s basketball team.
Una nang mipasabot ang Aurora Police nga wala silay nakitang timailhan sa foul play sa maong pagkalumos ug mihangyo sa publiko nga likayan ang pagpakaylap sa walay basehang mga espekulasyon. Samtang, nagpagawas na usab og subpoena ang Criminal Investigation and Detection Group o CIDG ngadto sa mga magdudula ug coaches nga posibleng adunay kahibalo sa nahitabong insidente.
Padayon usab ang kooperasyon sa Ateneo de Manila University sa mga otoridad aron masuta ug marepaso ang tanang kahimtang nga nakapalibot sa maong team-building activity.
Photo Courtesy: Philstar
