Arestado ang 24 anyos nga lalaki human makuhai og tulo ka sachet sa gituohang shabu ug nagkadaiyang drug paraphernalia sa Purok Nusaville, Barangay San Isidro, General Santos City, alas 10:45 sa gabii niadtong nakalabay nga adlaw.
Giila ang dinakpan sa alyas “Carbs”, ulitawo ug residente sa Barangay Bula sa nahisgutang dakbayan. Base sa report sa Police Regional Office 12, miresponde ang mga personahe sa Police Station 4 human makadawat og impormasyon gikan sa usa ka concerned citizen kalabot sa lalaki nga misulod sa usa ka gibiyaang balay.
Pag-abot sa kapulisan, nakita kuno nila ang suspek nga naggamit og substansiya nga gituohang shabu. Misulay pa kuno kini og ikyas dihang duolon sa mga pulis, apan nadakpan mga 40 metros gikan sa maong balay.
Narekober gikan sa itom nga waist bag sa suspek ang usa ka heat-sealed plastic sachet nga adunay gituohang shabu. Narekober usab sulod sa gibiyaang balay ang duha pa ka sachet sa gituohang ilegal nga droga, nagkadaiyang lighter, mga materyales nga copper wire, ug improvised tooter nga adunay mga timailhan sa gituohang shabu.
Gibanabanang mokabat sa 0.2900 gramos ang kinatibuk-ang gibug-aton sa tulo ka sachet, nga adunay standard drug price nga 1,972 pesos. Gidala ang suspek sa Dr. Jorge P. Royeca Hospital alang sa medical examination, samtang ipadala sa Regional Forensic Unit 12 ang mga nakumpiskang ebidensiya alang sa laboratory examination.
Giandam na ang kasong kalabot sa gituohang paglapas sa Sections 11 ug 12, Article II sa Republic Act 9165, o Comprehensive Dangerous Drugs Act of 2002, ug Article 151 sa Revised Penal Code, alang sa inquest proceedings sa Office of the City Prosecutor.
Photo courtesy: PRO12
