Nadakpan sa kapulisan ang usa ka 26-anyos nga lalaki human giingong misukol ug wala motuman sa mga sugo sa mga pulis atol sa ilang pagresponde sa gubot sa Block 2, Santiago Subdivision, Barangay Bula, General Santos City, pasado alas-5:50 sa hapon niadtong nakalabay nga adlaw.
Ang suspek nga giila lamang sa alyas “Ods,” residente sa Barangay Dadiangas South, giingong nahimong agresibo ug balik-balik nga wala motuman sa mga legal nga sugo sa mga pulis nga miresponde sa gitaho nga kagubot.
Narekober gikan sa bulsa sa shorts sa suspek ang usa ka pakete sa gidudahang shabu nga may gibug-aton nga 0.3459 gramos ug gibanabanang kantidad nga 2,352 pesos ug 12 sentimos.
Giandam na sa kapulisan ang kasong pagbatok ug pagsupak sa tawo nga anaa sa katungdanan, lakip ang paglapas sa Comprehensive Dangerous Drugs Act of 2002. Ang gidudahang droga isumiter sa General Santos City Forensic Unit alang sa laboratory examination.
